Dit is seker een van die natste Januaries wat ek in ‘n lang tyd beleef het.
As dit nat en koud is, is ons eerste instink altyd om die kinders binne te hou. Ons soek aktiwiteite wat ons binne kan doen, wat die kinders besig en tevrede – en droog- kan hou. En moenie my verkeerd verstaan nie, dit is nodig. Ek het ‘n hele blogpost oor 9 binnenshuise aktiwiteite wat jy met jou kleuter kan doen, lees dit gerus hier.
MAAR, hoe ouer my kinders word en hoe meer ek lees, hoe meer besef ek die noodsaaklikheid van spel BUITE. Dit is amper asof ons samelewing spel binnenshuis prioritiseer. Dit is ‘arts en crafts”, verf, TV kyk, huiswerk doen, noem dit op, alles gebeur binne. En as dit dan nou twee weke al natterig is, dan kan ons op ons een hand die hoeveelheid ure wat die kinders buite was, tel.
Deesdae prioritiseer ons buitespeel in reënweer.
Ek wens ek kon sê ek het die reënspelery begin, maar dit was definitief die kinders wat altyd jubelend buite toe hardloop as dit reën. Ons hou wel aan daarmee omdat ek die voordele kan sien. Ek het opgehou met “nee kom terug, julle klere gaan nat word” of ” as jy in daai modderpoel spring….”
As dit reën, is hierdie my voorstelle.
- Stuur die kinders buite toe!
Probeer ten minste twee keer ‘n dag. Vroegoggend is goed vir hulle kirkadiese ritmes, of kies ‘n tyd wat die reën ‘n klein bietjie bedaar het. ( of gaan as dit sous – dit is nou eers pret. Ons doen dit nie so gereeld nie, maar as ons in die winkels was die hele dag en geen tyd gehad het vir buite speel nie, sal ek sommer ons almal deur die gietende reën laat hardloop. Ek druk hulle direk daarna sommer in die bad). Daar is NIKS so lekker soos om te speel in ‘n motreëntjie nie. Ons het vir ‘n rukkie in Engeland gewoon en daar het ek gesien en geleer hoe baie kinders nat weer geniet – jy hou nie jou kinders binne nie! Tensy die donderweer nie slaan of die wind jou wegwaai nie, gaan speel buite! My kinders het elk so ‘n reenpakkie wat ek aantrek, met wellies of waterstewels en dan het hulle ure se pret! (google net rainsuits en jy sal in Suidafrika ook kry). Jy kan hulle net met gewone klere uitstuur en soms doen ons dit ook, maar ek vind hulle speel langer buite as hulle waterdigte kleertjies aan het, al is dit net ‘n reënjas. Omdat hulle nie so maklik nat word nie, kry hulle nie so vinnig koud nie en speel dus langer. Soms gee ek ‘n ou saambreel of klein tafeltjie saam, waarmee hulle skuilings of huisies bou. Probeer ten minste twee keer ‘n dag. Vroegoggend is goed vir hulle kirkadiese ritmes, of kies ‘n tyd wat die reën ‘n klein bietjie bedaar het. (of gaan as dit sous – dit is nou eers pret. 😊 Ons doen dit nie so gereeld nie, maar as ons in die winkels was die hele dag en geen tyd gehad het vir buite speel nie, sal ek sommer ons almal deur die gietende reën laat hardloop. Ek druk hulle direk daarna sommer in die bad).
- Gaan stap!
Hierdie sluit baie aan by nommer 1, maar ek vind tog dat die kinders soms ‘n behoefte het om uit te kom, verder as hulle eie tuin. Ek trek weereens sommer wellies vir die kinders aan en dan stap ons om die blok of parkie toe. Die kinders plas in die poelietjies of vang die reëndruppels. Ons sal uit die aard van die saak nie gaan stap as dit absoluut sous nie, maar sodra die ergste reën verby is, stap ons lekker. Ek het ‘n deursigtige reënkappie vir die stootwaentjie en die baba verkyk haar aan die reëndruppels wat bo haar kop val.
- Maak iets lekkers en eet dit op die stoep!
As ons nie buite kan speel nie omdat dit te erg reën, maak ons gewoonlik tuisgemaakte warmsjokelade of pannekoek en drink dit op die stoep! Ons het ‘n lekker stoep waar jy voel jy sit in die wind en die weer, maar jy bly droog. Dalk het julle ‘n lapa, balkon of sommer net ‘n deur? Ons sit baie keer sommer so voor die voordeur, veral as dit laatmiddag is en die kinders wag vir hulle pappa om van die werk af terug te kom. Ek het onlags ook my eie malvalekkers begin maak en dit is nou eers ‘n bederf. ‘n Aander maklike versnappering wat ek om een of ander rede met reën assosieer, is springmielies. Dit is lekker om bietjie die wind en die weer op jou vel te voel, so ek sal regtig voorstel julle sit iewers waar mens nie in die reën is nie, maar nogstans naby daaraan voel.
Soms bring ons komberse en kussings en verkykertjies en kyk na die voëls, bome, blare, druppels, watookal. Ek is vas oortuig daarvan dat my kinders hulle eie speletjies moet kan uitdink en nie die heeltyd my nodig het om te kan speel nie, maar reënweer is tog ‘n spesifieke tipe lekker. Ek sit dus graag saam met hulle vir ‘n uur onder die kombers en kyk na die tuin in die reën of speel een of ander speletjie.
Toe ek klaar hierde bloginskrywing geskryf het, het ek my seuntjie gevra, “Wat hou jy die meeste daarvan om te doen as dit buite reën? Sonder huiwering antwoord hy: “om in die reën te speel”. Daar het jy dit – uit die perd se bek. Ek het omtrent elke dag ‘n stelletjie modderklere wat in boerseep lê en week, maar dit is absoluut die moeite werd.
Lekker buitespeel!
Liefde
Renate
